Oleh: Armando Soriano
![](https://blogger.googleusercontent.com/img/b/R29vZ2xl/AVvXsEix80Pq0GULldwhTIqSCi11c9Jgk1pzLqC9MIeWOsKVW62_kfHT7sE1040OpNkjGwr3b4t2RiRXkZv5kfnUM3JN7ckqHJmnssYn-sEiQeffMV9m2GJ2w3pIS-miP81lgaQ2bN4NJfgOUyOq/w640-h466/MandoKartunKupg.jpg)
Ilustrasi: Armando Soriano
Carita Mula Mula 32:22
Ma Yakob tenga sandiri di situ. Ais ju, ada satu laki-laki datang, ko bagulat deng dia sampe amper siang. Waktu itu laki-laki rasa dia su mau kala, ju dia hantam Yakob pung pinggul, sampe dia pung tulang bonggol talapás dari dia pung tampa dudu.
Tarús, itu laki-laki bilang, “Lapás sang beta, te lai sadiki matahari su mau nae.” Ma Yakob manyao, bilang, “Lu omong kasi berkat sang beta dolo, baru beta lapás sang lu!”
Ju itu laki-laki tanya, bilang, “Lu pung nama, sapa?” Dia manyao, bilang, “Yakob.” Ais, itu laki-laki omong, bilang, “Lu pung nama, bukan Yakob lai. Ma mulai sakarang, orang pange sang lu Isra'el, tagal lu su bajuang lawan manusia deng Tuhan Allah, sampe lu manáng.” (Nama Isra'el pung arti ‘yang bagulat deng Allah’).
Tarús Yakob tanya, bilang, “Lu pung nama, sapa?” Ma itu laki-laki bilang, “Lu mau tanya beta pung nama, bekin apa?” Ais ju dia omong kasi berkat sang Yakob di situ.
Lantas Yakob omong bilang, “Beta su dapa lia Tuhan Allah muka deng muka, ma beta masi idop.” Tagal itu, dia kasi nama itu tampa, Peni'el yang dia pung arti ‘Tuhan pung muka’.
Matahari su nae, waktu Yakob jalan kasi tenga itu tampa. Ma dia jalan doka-doka, tagal dia pung pinggul tasala. Andia ko sampe sakarang, orang Isra'el dong sonde makan binatang pung daging pinggul, tagal Tuhan puku bekin tasala dong pung ba'i Yakob pung tulang pinggul.
Kupang, 21 Juli 2019.
0 Response to "Yakob Bagulat deng Tuhan"
Posting Komentar